Береке мен бірлікті өзімен бірге ала келетін Наурыз мерекесін «Ақмешіт» колледжі ұжымы барлық салт - дәстүрімен, әдет-ғұрпымен, сән-салтанатымен жоғары дәрежеде атап өтті. Мерекеге жиналған «Шұғыла» мөлтек ауданының жұртшылығына концерттік бағдарлама ұсынып, ұлттық тағамдардан жасалған дастархан жайды. Ұлттық киім киген тұрғындар бір-бірімен құшақ айқастыра қауышып, ұлтымыздың ежелден келе жатқан ғұрыптарын бұл күні тағы бір  айшықтай түсті.

«Наурыз» ән орындаушылар тобының орындауында ұлттық әндеріміз шырқалып, шашу шашылып, үлкен қарияларымыз жиналған жұртшылыққа батасын берді. Ұжым басшысы А.Т.Шегенбаев келген қонақтарды Наурыз мерекесімен құттықтап, қоғамдық жұмыстарға белсене араласқан бірқатар әріптестер мен қызметкерлерге ақшалай сыйлық пен марапаттар табыстады.

Мерекеде ақ шаңқан аппақ киіз үй тігіліп, ұлттық ойындар ойналып, жүлделі орындарға сыйлықтар ұсынылды. Сонымен қатар, «Ақмешіт сұлтаны - 2019» байқауы өткізіліп, нәтижесінде «кәсіби техникалық пәндер» бірлестігінің жас маманы Б.Әбдіхалық бас жүлдені иемденіп, алға шықты.